អតីតកីឡាករភ្នំពេញក្រោន៨នាក់អាចចូលប្រកួតវិញបាន

អតីត​កីឡាករ​បាល់ទាត់​របស់​ភ្នំពេញក្រោន ចំនួន​៨​នាក់ អាច​​ប្រកប​អាជីព​បាន​ឡើង​វិញ​ហើយ​ បន្ទាប់ពី​ទទួល​ពិន័យ​​មិន​ឲ្យ​ចូល​ទីលាន​ចំនួន​៦​ខែ ក៏​ដូចជា​៦​ប្រកួត​រួច​មក។
យោង​តាម លិខិត​លេខ ០៩៨/១២ ស.ប.ក ដែល​ចេញ​ដោយ សហព័ន្ធ​កីឡាបាល់ទាត់​កម្ពុជា ​បាន​បង្ហាញ​ឲ្យ​ដឹង​ថា កីឡាករ ទាំង​៨​រូប​នោះ​រួមមាន ​ខ្សែ​ប្រយុទ្ធ​ ចាន់ ឆាយា(ភ្នំពេញក្រោន), ​សាន ណារិទ្ធ(ណាហ្គាខប)  ស៊ុន សុវណ្ណរិទ្ធី(ណាហ្គាខប),  អ្នក​ចាំទី ប៉េង​ ប៊ុនឆាយ(បឹងកេត), ខ្សែ​បម្រើ ហុង រដ្ឋនា(បឹងកេត), ​ខ្សែ​បម្រើ ស៊ុន សុបញ្ញា(ណាហ្គាខប), ធុល សុធារិទ្ធ(ណាហ្គាខប), និង ខ្សែ​ប្រយុទ្ធ​ សួង វិរៈ (ប៉ូលិស)  សុទ្ធ​តែ​អាច​ចូល​ទីលាន​ ប្រកួត​បាន​​​សា​ជា​ថ្មី​។

គេ​នៅ​ចាំ​បាន​ថា កីឡាករ​ទាំង​៨​នាក់​ខាង​លើ ត្រូវ​បាន​ពិន័យ បន្ទាប់​ពី​គណៈកម្មការ​វិន័យ​​ នៃ​ សហព័ន្ធ​កីឡា​បាល់ទាត់​​​អាស៊ី ​បាន​រក​ឃើញ​​ការ​ប្រព្រឹត្តិ​​ទង្វើ​​មិន​គប្បី​ពេល​ក្រុម ភ្នំពេញក្រោន ​ចាញ់ Taiwan ​ ២-៣ កាល​ថ្ងៃ​ទី​ ២៥​ ខែ កញ្ញា​ នៅ​ក្នុង​វគ្គ​ផ្ដាច់​ព្រ័ត្រ​នៃ​ពាន​រង្វាន់ AFC President’s Cup 2011 កន្លង​មក៕